MTUNZI: George Iron
Kikao cha mwisho
kilitarajiwa kukaa baada ya siku tano, shamrashamra za hapa na pale
zilirindima, wapambe wa bwana harusi mtarajiwa hawakukoma kumtumia jumbe
mbalimbaliu za kumtakia mafanikio tele katika ndoa yake aliyotarajia kufunga
baada ya siku chache. Upande wa mwanamke napo palikuwa panawaka moto wa furaha.
Hatimaye alikuwa anaenda kuolewa.
Mahusiano yao
yaliyodumu kwa miaka kadhaa yalikuwa mfano wa kuigwa na vijana wengi wa makamo
yao. Walianzia urafiki, upenzi na wakaufikia uchumba hatimaye ndoa ilikuwa
inanukia. Hakika walistaajabisha.
Kama ni migongano
ilikuwa midogo midogo ambayo haikufika machoni pa watu wengi. Hili jambo
liliwaimarisha sana, siri, uvumilivu na kujiamini katika mapenzi yao.
Walishirikiana katika
siri zao zote za ndani kabisa, wakati huo Benson akiwa ni masikini wa kutupwa
na Grace akilelewa na mjomba wake.
Lilipokuja suala la
kujitoa kwa ajili ya mpenzi basi Grace aliongoza. Alifanya kila kitu kwa ajili
ya mpenzi wake, jambo hili lilimpa Ben wasaa wa kujiuliza, ni mwanamke gani
mwingine anaweza kumja,li na kumthamini kama afanyavyo Grace. Jibu lilikuwa
jepesi tu. Hakuna kama Grace.
Jibu hili
likamuimarisha na kujikita moja kwa moja katika penzi la Grace, maana
aliyofanyiwa na binti huyu ni makuu.
Lakini kuna jambo moja
ambalo Ben hakuwa akilitambua, jambo hili lilikuwa ni siri, siri ya aina yake
ambayo ni vyema kuiita fumbo gumu.
Fumbo ambalo tangu
awali lilimpa maswali lakini hakuweza kuyatatua, alijiuliza mpaka kichwa
kikamuua bila kupata majibu. Na hata zilipokuwa zimesalia siku hizo kadhaa
waweze kuwa mke na mume fumbo lilikuwa halijafumbuliwa na hakujishughulisha
tena katika kulifumbua.
Lakini wakati akiwa
amelipuuzia anakutana na jibu la fumbo lile, jibu ambalo linamuweka katika
mtihani mgumu kupita yote aliyowahi kukutana nayo maishani. Mtihani wenye
mtihani ndani yake.
Akajikuta katika
maamuzi ya aina mbili tu na anatakiwa kuchagua moja. Aidha kusuka ama kunyoa.
******
HALI ya chumba ilikuwa
swadakta, Ben alikuwa akitabasamu pekee wakati akipitia baadhi ya jumbe katika
simu yake, jumbe nyingi zilimpongeza kwa hatua aliyokuwa amefikia hatua ya
kumuoa Grace, tena ndoa ya kubarikiwa kabisa. Ben hakuwa na kingine cha kujibu
zaidi ya kusema asante.
Ujumbe mmoja ulikuwa
tofauti kidogo, ujumbe huu kutoka katika namba mpya ulikuwa si wa kumpongeza
bali wa kushangaza.
“Ichukue chini ya
godoro uisome.” Ulimalizika hivyo. Ben kidogo asijishulishe na ujumbe ule
lakini akaona ni uvivu usiomithirika, yupo kitandani na ujumbe unasema afunue
godoro, mbona asifunue? Alijiulize na kujiona mpuuzi sana.
Akafunua godoro lake
pasipo na mategemeo ya kukuta chochote kitu.
Maajabu!! Akakutana na
bahasha ambayo hakuwahi kuiweka yeye kwa mikono yake. Bahasha ya kaki!!
Akainyofoa taratibu kama
anayehofia isichanike kwa namna yoyote ile. Akaipakata mapajani mwake, haikuwa
nzito sana na nje haikuwa na neno lolote lile.
Mapigo ya moyo yakaanza
kwenda mbio, akajiuliza tofauti na Grace ni nani awezaye kuingia chumbani kwake
bila ruhusa? Ama hata akama ameruhusiwa ni nani? Maswali haya alijiuliza huku
bahasha ikiwa inatazamana naye.
Benson akataka kumpigia
Grace simu na kumuuliza lakini hapohapo akahofia kuwa Grace atataka kujua ni
kitu gani kilikuwa katika bahasha ile, ama anaweza kuomba isifunguliwe hadi
hapo atakapofika yeye.
Vipi yakikutwa mambo ya
ajabu katika bahasha hiyo, si kitakuwa kizaazaa!! Alijionya na kuamua kufanya
maamuzi ya kiume.
Akaichana ile bahasha
taratibu, kisha akachomoka na karatasi kadhaa nyeupe zikiwa na maandishi meusi
yaliyochapishwa kwa kompyuta.
“Mh!” akaguna Benson
huku akiyakunjua na kuyaweka vyema ili ajue kuna nini.
Lahaula! Ni barua kama
sio tungo!! Tungo tata, ambayo huwezi kuisoma ukaishia katikati na kuijua
maana. Benson akajikohoza kisha akaanza kuisoma kwa utulivu na umakini wa hali
ya juu.
ILIANDIKWA HIVI.
Wasalaam Benson,
Najua unajiuliza
maandiko haya yamefika vipi katika kitanda chako, ni mimi niliyeyaweka hapo ili
uyasome na kufanya maamuzi ndani ya siku saba kabla ya ndoa yetu.
Ningeweza kuyasema
mbele yako lakini sio kiufasaha kama nilivyoweza kuandika, kwa maneno huenda
usingemalizia kunisikiliza lakini katika maandishi naamini utasoma na kumaliza
kila herufi moja baada ya nyingine.
Benson, naamini
unanipenda sana mume wangu mtarajiwa nami nakupenda sana hilo nadhani unalijua
waziwazi, na kamwe sijawahi kuchoka kukupenda. Lakini licha ya kukupenda kote
huku sidhani kama nitakuwa shahidi mzuri mbele za mungu iwapo nitaingia katika
familia yako kama mke huku nikiwa na mzigo huu moyoni, Benson.
Nadhani unafahamu ni
katika mazingira yapi tulikutana, mimi na wewe tulikutana hospitali, mama yako
akiwa anaumwa sana. Na siku hiyo dada yangu alikuwa amejifungua mtoto na
alikuwa wodi moja na mama yako, ni mimi niliyeuanzisha undugu wetu pale nilipokusalimia
kisha nikamjulia mama hali. Haukuwa umechangamka na hata mama alipolalamika
njaa ndipo nikagundua hukuwa na pesa ya kumnunulia chakula, nilipojitolea
kumnunulia ndipo undugu wetu ulipoanza na ukafikia hatua ya kuniamini na
kunielezea juu ya maisha yako ya wakati huo, haukuwa na kazi na ulikuwa wewe
pekee unayemuhudumia mama yako. Sikutaka kuuweka ubinadamu wangu kando,
nikajitolea pesa yangu japo sikukueleza kuwa ilikuwa pesa ya ada nikamuhudumia
mama na wewe kwa wakati ule. Sikuwahi kukuambia kuwa pesa ile ilinivuruga akili
sana, na nikajikuta nikitumia mbinu nyingine kuitafuta, nililazimika
kuudhalilisha utu wangu ili tu niipate, nikafanya mapenzi na mkufunzi wa chuo chetu,
akanipatia pesa nikalipa ada na ule ukawa mwisho wa mahusiano yetu. Nilifanya
vile kwa sababu maalum, nisingeweza kuipoteza shule, walezi wangu
wasingenielewa hata kidogo.
Sahau kuhusu hili
Benson maana lilitokea nikiwa sina mahusiano na wewe, lakini ukumbuke wakati
ulipokosa kodi ya nyumba na mwenye nyumba akachachamaa akitaka kuwatolea vyombo
nje, nakumbuka jinsi mama alivyolia na mimi nikiwa kama mpenzi wako, msichana
ninayekupenda kwa dhati niliguswa sana na kujikuta nikijisikia kufanya kitu kwa
ajili yako, shida zako ni shida zangu. Nina kitu gani cha kuuza Ben ili nipate
pesa ya upesi ya kukusaidia, lakini wapo watu na pesa zao waliokuwa wakinitaka
kimapenzi, si kwamba nilitamanishwa nao na pesa zao la! Niliguswa zaidi na
matatizo yako. Nikiwa naumia roho nikajiingiza katika penzi jingine la masaa
kadhaa. Baada ya zile siku mbili tulizomuomba mwenye nyumba nilikuja na
kukupatia kiasi chote cha pesa na kodi ikalipwa, nilikupa pesa ile nikiwa
naumia sana lakini je kipi bora? Mimi kuumia ama mpenzi wangu na mama mkwe
wangu kudhalilishwa? Kwangu ilikuwa vyema kuumia mimi kwa ajili yenu.
Nakueleza haya mapema
kabla haujafika ule wakati wa maadui kujifanya marafiki kisha waanze kukupamba
mwishowe uniache solemba, nakuandikia haya maana ni aibu kukueleza huku
nikikutazama usoni.
Na ninaayandika haya
hasahasa baada ya kugundua jambo jingine la ziada. Jambo zito zaidi ambalo
litamalizia kurasa za barua hii kisha nikusikilize upande wako unasemaje maana
siwezi kuishi na siri hii, sitakuwa na amani hata kidogo.
IKUMBUKE siku ambayo
nilikaa mimi na wewe kujadili juu ya mahari ambayo walezi wangu walimtajia
mshenga uliyemleta. Siku hiyo tulikuwa nyumbani kwako na mahari ikaonekana kuwa
kubwa sana, nilikutia moyo kuwa tutaipata na kulitimiza lengo. Haukuamini kwa sababu
nilikuwa sina kazi baada ya kuwa tu nimemaliza chuo. Tuliumiza vichwa sana na
kisha nikakueleza kuwa nitatafuta mahali niweze kukopa kisha nikupatie ulipe
halafu taratibutaratibu tutaitafuta na kuilipa.
Kweli nilifanikiwa
kukopa hiyo pesa kutoka kwa mfanyabiashara za samaki, alinikopesha kwa mgongo
wa rafiki yangu, nilichukua ile pesa kama ilivyo na kukuletea bila kujua
nitairudisha vipi. Mwezi ukakatika na hatimaye miezi miwili mwenye pesaa
akaanza usumbufu, sikupenda kukueleza jinsi ninavyosumbuliwa lakini hali
ilikuwa mbaya sana Ben, nikaamua kumtafuta tukakaa tukaongea juu ya hilo
nikamweleza kuwa nimekaribia kupata kazi nitakuwa namlipa awamu kwa awamu.
Nilipomtazama machoni nikagundua kuwa hana shida na pesa tena bali kuna neno
anataka kulisema lisilohusiana na pesa. Neno gani jingine tofauti na mapenzi,
hakika ilikuwa hivyo alinichombeza hivi akanichombeza vile na mwisho wa siku
ilinilazimu nikubali kukusaliti kwa mara ya tatu ili tu kuiepuka aibu ile,
unadhani mimi ningetoa wapi pesa ya kumlipa upesi kama alivyotaka. Hakika
nisingeweza, nilikubali kuwa naye huku nikijiapiza kuwa sitathubutu tena
kukusaliti Ben, nilijipa imani hiyo kwa sababu muda wangu wa kuajiriwa ulikuwa
umekaribia na iwapo ningeipata ajira basi matatizo ya pesa yangeishia hapo japo
kwa udogo kiasi.
Nilienda nyumbani kwake
ile siku niliyokuambia kuwa naenda kwa
mama mdogo, niliondoka huku roho ikiniuma sana maana uliniambia
unanipenda sana, kama unakumbuka siku hiyo nililia huku nikiwa nakukumbatia.
Niliumizwa na nilichokuwa naenda kufanya mbele yangu.
Hakikuwepo kipingamizi
nikafika nyumbani kwake na alikuwa aidha akiishi peke yake ama la alikuwa
ameamua kuwa peke yake siku hiyo, pesa zake nikazilipa kwa kulala kitandani
kwake. Nililala na kufanya naye mapenzi. Usaliti wa tatu.
Ben najua una hasira
sana, lakini lipi heri kukudanganya ama kuishi nawe tukiujua ukweli?
Na bado unajiuliza kwanini nimekuandikia haya
huku huyu mtu wa mwisho nikimsisitizia sana. Ben nimesisitiza juu ya huyu mtu
kwa sababu lipo la ziada ambalo mimi lilinishtua sana lakini huenda wewe
litakushtua zaidi. Mara ya mwisho kuonana na mzee huyu ni mwezi mmoja nyuma
nilipompa penzi kufidia pesa yake. Na unatambua kuwa nina mimba yako kwa sasa,
mimba ambayo hakuna ajuaye zaidi yangu mimi na wewe. Nina mashaka na mimba hii
mashaka makubwa sana kuwa ni ya huyo mzee, maana nakumbuka kuwa mwanzoni
alitumia kinga lakini katika usiku wa giza hakutumia kinga. Huo ni wasiwasi
ambao ninao na ninahisi kabisa kuna walakini.
Hilo bado sio zito
lililonisukuma kuandika haya, tatizo ni kwamba siku ile kamati inakaa,
nilimuona mzee huyo, sasa najiuliza ni nani yako mzee yule. Mzee Daudi Machota,
ni nani kweako hadi ahudhurie kikao kikubwa cha harusi. Jambo hili limenitia
wasiwasi na kunisukuma kuyaandika yote haya kwako. Ili asijekukuambia kitu
kisha ukakichulia kama kilivyo na kunitosa kwa talaka..
Nimeyaandika haya ili
kama ni stahili yangu kuhukumiwa basi unihukumu sasa kabla hujaniita mkeo wa
ndoa.
Niliyafanya kwa ajili
yako na kwa ajili ya penzi letu. Najua ni makosa makuu hata nikisema unisamehe
hakuna lolote linalobadilika.
Nisingeweza kuyamaliza
haya huku ukiwa mbele yangu maana nakujua nawe unanijua vyema.
Wako katika penzi,
Grace Mbaliga.
Mikono ilikuwa
inamtetemeka Ben, karatasi ilikuwa imelowa jasho lililokuwa likitiririka kutoka
katika paji la uso wake na mikono pia. Akili ilikuwa imesimama kisha kile
chumba akakiona kama kinazidi kuwa kidogo na kumsababishia joto kali, hali
ilikuwa tete sana.
Kizito
kilichomchanganya ni jina la David ama Daud Machota katika barua ile. Alirudia
kusoma mara mbilimbili, akajiuliza iwapo muandishi alikuwa anamaanisha kile
alichokuwa amekiandika ama yupo katika utani. Lakini utani gani wa kurasa zote
zile zilizoandikwa kiustadi na kumbukumbu ya hali ya juu.
Baba yangu!! Hivi ni
baba yangu kweli ama!!! Benson alijiuliza huku akishikwa na kigugumizi, jina
hilo lilikuwa na baba yake mzazi ambaye alitoweka miaka mingi iliyopita
akimtelekeza yeye na mama yake, sasa amerejea tena katika familia baada ya
kusamehewa. Siri hii Ben alitarajia kumweleza Grace siku watakapokutana kwani
hata yeye alikuwa hajatarajia jambo hilo. Lakini Grace kumbe aliwahi kuwa
mpenzi wa baba yake, na ana mashaka kuwa hiyo mimba ni ya baba yake.
Mungu wangu weee!!
Alihamanika Ben. Na kujikuta katika mtihani mkubwa ambao aliamini kabisa kuwa
mtihani ule ni mkiubwa kuliko umri wake wa miaka ishirini na saba.
Alikuwa na mtihani wa
kimaamuzi, je azuie ndoa kufungwa, je? Amshauri Grace atoe mimba ama …ama……alikosa
maamuzi hakika.
Mara alirudisha macho
katika ile barua, kumbe kuna mistari miwili ya ziada ambayo bila shaka
ilisahaulika wakati wa kuandika, hii iliandikwa kwa wino wa kawaida kwa kutumia
mkono.
“Natamani ningeitoa
mimba hii maana najua itazua utata lakini tatizo kwetu kutoa mimba ni mwiko,
ukitoa mimba na kizazi kinapotea milele.”
Ewalaa!! Mstari huu
ukaikoroga kabisa akili ya Ben, akapagawa kabisa, alitamani kupiga kelele
lakini akajikuta akiiongoza akili yake kuukwepa wazimu uliokuwa unamnyemelea.
Akajilaza kitandani,
akashangaa godoro lake imara likamuumiza mgongo. Ilistaajabisha sana. Akatazama
kushoto akakutana na kikopo ambacho huwa anakitumia kuhifadhi dawa zake. Akatoa
‘pilton’ akameza tatu. Hizi zikamchukua baada ya dakika kadhaa, akasinzia
haswa. Alifanya hivi ili kujizuia asipagawe.
*****
ZILIKUWA zimesalia siku
tatu ndoa kati ya Ben na Grace iweze kufungwa, kwa watu wa nje kila mmoja
alikuwa akifurahia ujio wa siku hiyo ya aina yake iliyoongezewa ujazo na muuza
samaki, baba mpotevu wa Ben ambaye alikuwa amerejea kwa kishindo.
Ukumbi wa kisasa na
mkubwa ulikuwa umekodiwa kwa ajili ya siku hiyo. Hakika ingefana sana, hapakuwa
na kipingamizi.
Grace aliyetegemea
majibu ya upesi kutoka kwa Ben alikuwa katika sintofahamu akijiuliza ni kipi
kinaendelea katika kichwa cha Ben, alifikia hatua ya kujiuliza iwapo Ben
anaweza kumkana kanisani wakati wa kuvishana pete. Wazo hili lilimtesa sana na
kumfanya mgonjwa kwa muda.
“Anawaza nini huyu
mwanaume sasa!!” Alijiuliza Grace katika namna ya kughafirika. Lakini hii
haikusaidia kitu na haikubadili siku ya ndoa yao. Baada ya siku tatu tu!!! Siku
tatu!!
Siku hiyo ikamalizika
na hatimaye zikabaki siku mbili, moja ya maandalizi ya mwisho na nyingine siku
maalum kwa ajili ya kufunga ndoa.
Grace akaona hapana,
hakuwa tayari kuaibika mbele za watu, akaamua kumpigia simu Ben.
Hola!! Hakuwa
akipatikana katika namba zote..
Akafunga safari kwenda
nyumbani kwa Ben.
Kappa!! Hakuna mtu
katika nyumba ile.
Hofu yake ikazidi
kujikita katika moyo wake, ni kweli walikuwa wamejifunza kila kitu, jinsi ya
kutembea na namna ambavyo watafungua muziki lakini yote hii haikuwa na maana
bila Grace kulisikia neno la Ben. Ben alikuwa ameamua nini baada ya taarifa ile
ndefu na chafu? Hakupata jibu hadi siku ya siku ilipofika. Siku ambayo
alishindwa kuitabiria itakuwa ya namna gani, siku ya kwenda kukutana na
mwanaume ambaye ameyasoma maovu yake katika karatasi na kisha kukaa kimya bila
kusema lolote.
Kidogo Grace akatae
kwenda kanisani, lakini hapakuwa na tetesi yoyote ya jambo lolote kuwa haliendi
sawa, si upande wa mwanaume wala mwanamke. Kwa kifupi hali ilikuwa shwari.
SIKU YA SIKU IKATIMIA
KANISA lilikuwa
limefurika watu, palikuwa na ndoa nyingi zilizofungwa siku hiyo hivyo kila
familia ilikuwa na umati wake. Nyimbo zilizopigwa zilikuwa za furaha na shangwe
tupu. Nyuso za furaha zilizidi kulipendezesha kanisa.
Magari ya kifahari na
ya kawaida yalikuwa yameegeshwa nje ya kanisa, mengi yao yalikuwa yamepambwa
kwa maua na mapambo mengineyo. Familia ya akina Grace ilitangulia kufika
ikifuatiwa na ile ya akina Ben baadaye kidogo.
Macho ya Ben
yakagongana na yale ya Grace, Grace akawahi kuinama lakini Ben hakuonyesha
wasiwasi wala hali yoyote ya tofauti.
Utaratibu ukafuatwa na
ndoa zikaanza kufungwa.
Grace akiingoja aibu
yoyote ambayo inaweza kumkuta kwa kuamua kuwa muwazi, lakini alijitia matumaini
kuwa mbele za Mungu alijihesabia haki kwa kuusema ukweli kabla ya ndoa.
Ben akiwa katika suti
yake maridadi alijisogeza ubavuni mwa Grace kisha akaanza kunong’ona naye kabla
majina yao hayajaitwa kwa ajili ya kufungishwa ndoa.
“Wewe ni mwanamke
jasiri na wa aina yake, ni mwanamme mpumbavu pekee awezaye kupumbazwa na
vitendo ulivofanya kisha akaamua kuachana nawe. Benson si mwanaume moumbavu na
ni mwanaume ambaye ana maamuzi yake sahihi kwa wakati muafaka. Kama ulifanya
yale kwa ajili yangu, nikikuacha utaenda kwa nani? Bila shaka utaenda kwa yule
ambaye umeyafanya haya bila kumuhusu yeye, wewe ni mwandani wangu, jana, leo,
kesho na hata milele. Kabla ya kusema mbele ya umati napenda kukusihi kuwa
kamwe sitakukana. Sitakugeuka hata kidogo.
Baba aliyenikana nikiwa
mtoto anabaki kuwa kama maharamia wengine uliokutana nao, isikushtue sana hiyo
mimba, nitaichukua kama yangu aidha jibu ni ndio ama hapana, hukuwahi kunivua
nguo na kunitangaza kuwa mimi ni mwanaume nikutegemeaye kwa kila jambo basi
amini kuwa sitathubutu kukuchafua kwa namna yoyote ile. Yawezekana ningeomba
ushauri basi tusingekuwa hapa leo, lakini je? Wewe uliomba ushauri kabla ya ya
kufanya uliyoyafanya kwa ajili yangu?? Naamini ungeomba ushauri ungeambulia
kuambiwa uachane na mimi, basi kama ulivyofanya maamuzi binafsi. Naam! Basi
nami nimefanya maamuzi binafsi, wewe ni mke wangu na nitadumu nawe milele yote
kwa uweza wa muumba aliyetukutanisha mimi nawe.
Wewe ni jasiri na
mwanamke wa kipekee. Amini kuwa ulichaguliwa kwa..” kabla hajamaliza…
“Bwana Benson na Bi
Grace” sauti katika kipaza ilisikika, Grace akajifuta machozi yaliyokuwa
tanamtiririka. Ben akafanya jambo ambalo lilizua shamrashamra pale kanisani.
Akamnyakua Grace na kumweka katika mikono yake, akambeba juu juu katika namna
ya kipekee, mpiga kinanda akaliona tukio hilo mara ghafla akaanza kukipiga
kinanda katika namna ya kusisimua, kanisa zima likalipuka kwa nderemo na
vifijo. Kila mmoja alifurahia tendo alilolifanya Ben.
“Kama nilivyombeba leo
mbele yenu basi nitambeba milele hadi yule anayeenda kutuunganisha leo aamue
kututenganisha.” Aliyasema haya Ben katika kipaza sauti. Kanisa likalipuka tena
kwa shangwe.
Kiongozi wa kiroho
akaibariki ndoa ile. Kanisa zima likishangilia. Na hata alipomaliza kufungishwa
ndoa ikawa zamu ya Grace kufanya jambo jingine la kuvutia machoni.
Akachutama na kumsihi
Ben apande mgongoni. Ben akapanda Grace akaondoka naye kurejea katika siti zao.
“Na nitamlea hivi hivi
kama mtoto mdogo hadi atutenganishe aliyetuunganisha.” Grace akatamka. Kanisa
likapiga mayowe, akina mama wakawa wanalia, kilio cha furaha. Hakika ilipendeza
sana.
BEN hakuwa na masihara
aliamua kutoka moyoni kuwa mume wa Grace hivyo alisawazisha yote ambayo
yangeonekana kuwa kikwazo hapo baadaye, mzee Daud aliomba msamaha yakapita
lakini hakuambiwa kama Grace ni mjamzito. Hilo ndio lilikuwa zito lakinilikaisha
kwa wepesi tu.
Maisha yakaendelea huku
Ben na Grace wakiipa somo dunia kuwa wakati mwingine mitihani isitufanye
tukapoteza uelekeo wetu badala yake ituimarishe zaidi na zaidi.
Ama kwa hakika MITIHANI
NI KIPIMO CHA AKILI.
MWISHO.KESHO TUTAENDELA NA SIMULIZI YA NIMEKUCHOKA
Hakuna maoni:
Chapisha Maoni